ربنا خلقك عشاني كلمات الشاعر السيد علي القن
قصيدة
(((( ربنا خلقك عشاني ))))
انت خايف ليه ياقلبي
انت خايف م اللي عدي
والا خايف م اللي جاي
بأفتكر كام فات علينا
ف الحياه قدام عنينا
عشنا حلو وعشنا مر
شفنا صعب شفنا سهل
عمره ما أثر علينا
قلبنا كان قلب واحد
ربنا والهنا واحد
وحد الاحساس ده فينا
لسه فاكره خوفك عليا
ولا خوفي كمان عليك
وانت بتنام جوه عيني
وانا باتكحل عليك
لما بتدفيني روحك
وانا نايمه بين ايديك
لسه فاكره لك حروفك
ولا شعرك أو مشاعرك
ولا وصفك او عواطفك
ولا حب العمر فيك
كل ده شايلاه ف قلبي
يبقي أجمل حاجه فيك
شايله طيبتك أو شهامتك
أو رجولتك أو حنانك
حتي صورتك جنب قلبي
ولا صورتي جوه قلبك
ف الزفاف لايقه عليك
لسه فاكره حاجات كتير
من جمالها اكيد بغيير
كل ده واكتر كتيير
قولي ليه خايف عليا
وانت نور قلبي وعنيا
وانت كل الدنيا ليا
و الحياه وياك هنيه
وانت زاد قلبي وحياتي
وانت عمري و ذكرياتي
تسوي ايه الدنيا ديا
وانت فيها بعيد عليا
ده انت شمس الدنيا تضحك
لما تضحك سنه منك
والورود تطرح ف خدك
والطيور تتغني باسمك
ع الشجر وتغني شعرك
مستحيل اخاف يا قلبي
وانت جنبي وحتى مني
الأمان وياك حبيبي
والهنا فرحي وحليفي
والسعادة من نصيبي
ربنا خلقك عشاني
ربنا خلقك هديا
كلمات الشاعر / السيد علي القن
Commentaires
Enregistrer un commentaire