على جبين القمر كلمات عصام ابو العلا

على جبين القمر بكتب 

حكاية عشق منسية

أنا وانتي كنا أبطالها 

وكام صورة واغنية

ولحن حزين

على جرحي وعلى جرحك 

وعشق سنين

وأعيش الباقي من عمري 

ف آه وأنين 

واخبي دموعي جوايا وابان جامد

واحلف أني مش فاكرك بألف يمين

أنا الكداب وهتحاسب على كدبي

ف يوم الدين

وبدعي ربنا يعيني على الفرقة

وع الحرقة وع الاشواق

يا سكة مشيتها للأخر 

وأنا عارف أخرها فراق

واديني لوحدي من تاني كما العادة

أخدت من الهوا شهادة

بأني مدمنك جداً

وحبي ليكي ده عبادة

خلاص الفجر راح يدن 

وهادعي ربي من تاني 

اشوفك ضحكة وحشاني 

تهزى روحي وكياني 

لأخر مرة والله وهترتاحي 

خلاص رافع انا الراية

مسلم للهوا سلاحي

وخدني اسير

انا عاشق واخد تقدير 

وشيخ العشق يعرفني بإني كبير 

امير عشاق وواخد كورس في التعبير 

لكني باغير...

قوليلي ازاي 

اشوف شعرك بايس خدك

وماغرشي 

اشوف رمشك حاضن جفنك 

وماثورشي 

على ده الحال

اشوف ايدك علي وسطك اغير منها 

اشوف الطرحة علي صدرك اغير منها 

بغير منك علي نفسك وعمايلها

وادي الموال 

خلاص مقفول قولي عاشق قولي مخبول..

تعالي نكمل القصة ونتحمل كمان حبة 

وندر عليا هعملك حروف شعري 

نغم مغزول 

وتيجي دموعي اللي سبقاني 

وتحكي القصه من تاني 

واعاني و بتعاني 

ولا عارف مين الجاني 

ولا عارف مين المقتول

.......... ..... 

عصام ابو العلا

...